Braziliya futbol millisində 10 nömrəli formanın yeni sahibi müəyyənləşib.
Braziliya Futbol Konfederasiyası 10 nömrəli formanı “Barselona”nın hücumçusu Rafinyaya verib. Bununla da 29 yaşlı futbolçu yığma karyerasını başa vuran Neymarın əsas nömrəsinin yeni sahibi olub.
Rafinya Braziliyanın Avstraliya və Hindistan yığmalarına qarşı keçirəcəyi yoldaşlıq görüşlərində artıq 10 nömrəli formada meydana çıxacaq. O, daha əvvəl Neymarın iştirak etmədiyi bəzi matçlarda, o cümlədən dünya çempionatının seçmə mərhələsində bu nömrədən istifadə edib. İndi isə 10 nömrə daimi olaraq ona həvalə olunub.
Komandadakı digər nömrələrdə də dəyişiklik edilib. Endrik 9, Estevao 11 nömrəli formanı geyinəcək. Vinisius isə əvvəlki kimi 7 nömrə ilə çıxış edəcək.
Neymar 2026-cı il dünya çempionatından sonra Braziliya millisində karyerasını başa vurub. 34 yaşlı futbolçu yığmada keçirdiyi 130 oyunda 80 qol vuraraq milli komandanın bombardiri kimi tarixə düşüb. O, dörd dünya çempionatında Braziliyanın 10 nömrəli formasını geyinib.
Qeyd edək ki, Braziliya millisində 10 nömrəli formanı müxtəlif dövrlərdə Pele, Ziko, Rivaldo, Ronaldinyo, Kaka və Neymar kimi ulduzlar daşıyıblar. Rafinya isə Karlo Ançelottinin rəhbərliyi altında başlayan yeni mərhələdə bu tarixi nömrənin sahibi olacaq.
