Azərbaycanın gənclər və idman naziri Fərid Qayıbov idman federasiyalarının nümayəndələri ilə görüş keçirib.
Azərbaycan İdman Akademiyasında təşkil olunan sayca 24-cü belə tədbirdə nazir Fərid Qayıbov görüş iştirakçılarını salamlayaraq son dövrdə görülən işlər və qarşıda duran vəzifələr barədə danışıb.
Görüşün gündəliyinə uyğun olaraq VI İslam Həmrəyliyi Oyunlarının yekun hesabatı, 2028-ci ildə ABŞ-nin Los-Anceles şəhərində keçiriləcək Yay Olimpiya Oyunlarına hazırlıq prosesi, idmançıların qeydiyyatı və təsnifatlaşdırılması məsələləri barədə məlumat verilib.
Həmçinin süni intellekt (AI), “Azərfit” layihəsi, eləcə də fiziki və psixoloji hazırlıq planları barədə təcrübəli xarici mütəxəssislər Edvard Kolar, Rado Pisot, Matej Tusak və Tomaz Levakın təqdimatları dinlənilib.
Tədbirdə həmçinin, idman növləri üzrə məşqçilik kursları, nazirliyin tabeliyində fəaliyyət göstərən UGİM-lərlə bağlı məsələlər, cari il Seneqalda keçiriləcək Yeniyetmələrin Yay Olimpiya Oyunları, eləcə də Bakı-2026 “Dünyanın İdman Paytaxtı” barədə məlumat verilib, federasiyaların sosial media fəaliyyəti ilə bağlı hesabat təqdim edilib.
